સુરતઃ સુરતમાં કોરોના વાયરસના કેસમાં પાછલા કેટલાક દિવસથી સતત વધારો થઈ રહ્યો છે. આવામાં વાયરસ પર કાબૂ મેળવવા માટેના સતત પ્રયાસો કરવામાં આવી રહ્યા છે. વાયરસનો ફેલાવો અટકાવવા માટે સતત કારખાનાઓ અને બજાર પર નજર રાખવામાં આવી રહી છે. આવામાં શહેરની સ્થિતિ અંગે ખોટી વાતો કરીને લોકોમાં ભયનો માહોલ ઉભો કરનારા ડ્રાઈવરની પોલીસે અટકાયત કરી છે.
શહેરમાં પોતે નજરે 78-80 લાશો ગણી અને માત્ર 3-4 જણાવવામાં આવી આ પ્રકારની વાતો કરનારા ખાનગી હોસ્પિટલના ડ્રાઈવરની ઓડિયો ક્લિપ વાયરલ થઈ હતી. આ કિસ્સામાં પોલીસે ડ્રાઈવર સહિત બે લોકોની ધરપકડ કરી છે. આ ડ્રાઈવરે પોતે 108નો ડ્રાઈવર હોવાની વાત ઓડિયો ક્લિપમાં કરી હતી જોકે, તે એક ખાનગી હોસ્પિટલમાં કામ કરે છે.
ડ્રાઈવર રમેશ તેના પરિચિત ચંદુભાઈ સાથે ફોન પર વાત કરી રહ્યો હતો તે ઓડિયો ક્લિપ વાયરલ થઈ હતી. જેમાં પોતાને 108નો ડ્રાઈવર હોવાની ઓળખ આપતો હતો જોકે, તેને કોઈ કારણોથી 108ના ડ્રાઈવર તરીકે દૂર કરાયો હતો અને તે ખાનગી હોસ્પિટલમાં નોકરી કરે છે. જે ઓડિયો ક્લિપમાં તેના પરિચિતને સુરતમાં હવે રહેવા જેવું નથી પોતાના વતન જતા રહેવું જોઈએ તેવી સલાહ આપી રહ્યો છે.
હોસ્પિટલોમાં દર્દીઓ માટે જગ્યા નથી અને રસ્તા પર લાશો જોવા મળશે તેવી વાત કરીને અન્ય લોકોમાં ભયનો માહોલ ઉભો કરનારા રમેશની પોલીસે ધરપકડ કરી છે.
ઓડિયો ક્લિપ અંગે વાત કરતા GVK-EMRIના ઓપરેશન હેડ (ગુજરાત) સતીષ પટેલે કહ્યું, ‘મને પણ થોડા વોટ્સએપ ગ્રુપમાંથી આ ઓડિયો ક્લિપ મળી હતી. અમારી તપાસમાં મુજબ જે વ્યક્તિ બોલી રહ્યો હતો તે GVK-EMRIનો ભૂતપૂર્વ કર્મચારી રમેશ ભાયાણી છે. ભાયણીને બે વર્ષ પહેલાં આ સેવામાંથી બરતરફ કરવામાં આવ્યો હતો.’
જીવીકે-ઇએમઆરઆઈના સુરત ડિસ્ટ્રિક્ટ મેનેજર ફૈયાઝખાન પઠાણે તેની સામે આઠવા ગેટ પોલીસ સ્ટેશનમાં ફરિયાદ નોંધાવી હતી. જ્યારે મીડિયા સંપર્ક સાથે સંપર્ક સાધ્યો ત્યારે તેણે કહ્યું કે તે વાત કરવા તૈયાર નથી….
